Dal 2017 la storiche Cjase dal student di viâl Ungheria, uniche struture dal gjenar in centri a Udin, e je sierade. La Regjon, proprietarie dal imobil, che al ospitave 270 students, no à nancje scomençât i lavôrs di ristruturazion.
“Nus jere stât dit – esclarìs la presidente dal Consei dai students, Francesca Corte – che la cjase e sarès stade pronte intal 2022, ma al moment no je stade fissade nissune gnove dade di principi dai lavôrs. Intal 2021 a vevin dit che la ristruturazion e sarès costade dai 9 ai 12 milions di euros. Intal 2022 la cifre e je lade sù a 42 milions e duncje la spese e je deventade insostignibile. Cjartis ae man, o volìn savê i motîfs di chest aument. Ancje par chest o domandìn di clamâ une taule che e meti adun il Consei dai students, Regjon, Comun, Ardis (Agjenzie regjonâl pal dirit al studi) e Universitât. O crodìn che il dirit al studi al vadi di pari pas cu la pussibilitât di jessi a stâ in citât. Lis facoltâts no son dome ai Rizzi e vê ufiert ai universitaris la pussibilitât di vivi a Cjase Burghart, di proprietât privade, dome a fit ae Ardis, no pues jessi une soluzion. Puartâ i students in Borc Stazion par miorâ la situazion di degrât de zone no si pues acetâ. E tant mancul a saran ae puartade dai students fûr sede lis retis inte residence Campus, simpri privade, che e varès di jessi fate in vie Manin”.
Par Pierpaolo Olla, diretôr de Ardis, il probleme de Cjase dal student “nol è mai stât platât sot dal tapêt. Dopo il taramot de L’Aquila a son cambiâts i parametris abitatîfs e no si pues fâ bon che la Regjon e spindi dai 30 ai 40 milions di euros par restaurâ une struture che e restarès dut câs vecje. Miôr al sarès sdrumâle e fâle sù gnove. Par ce che al tocje vie Manin, il dialic cu la fondazion proprietarie dai spazis al è stât dome viert. In variis citâts la gjestion di residencis universitariis di bande di privâts e je stade un sucès. Si scuen tignî cont ancje dal sbassament dai students intai agns prossims. A pet dai Agns Sessante, i students di 19 agns a son il 15% in mancul. La dibisugne di puescj-jet intai agns prossims apodarès passâ dai 250 atuâi a 150. Il câl al è fisiologjic. Al tocje pontâ su residencis plui contignudis”. (A.D.G.) – 13.02.2023
