E je stade une setemane di grant lavôr pe sede di Tarcint de Crôs Rosse Taliane, impegnade intun progjet indreçât ae formazion al prin socors dai arlêfs des mediis dal Comun di Tarcint. Une ventine di volontaris a àn dât acet a 180 arlêfs dividûts in trê grups par mieze zornade inte sede di vie Udin. I fantats a àn frecuentât un mini-cors di formazion che ur à permetût di cognossi il mont de Crôs Rosse e imparâ ciertis manovris salvevite.
“I fantats a àn imparât trop che al è impuartant inviâ in maniere corete la cjadene dal socors, meti in sigurece un infortunât e ancje fâ in maniere corete un massaç cardiac – e à sclarît la coordenadore didatiche Lidia Beltrame -. Al è stât un impegn che la nestre sede e à cjapât cun braùre. O vin cirût di sclarî ai fantats trop che al è impuartant spindi ben un pôc dal lôr timp e trop che la ativitât di volontariât, come chê de Crôs Rosse, e pues ufrî lôr une ocasion di jessi utii”.
La Cri a Tarcint e je impegnade dal 1986 inte ativitât di socors teritoriâl 112 e di assistence aes personis in dificoltât. La gnove sede, screade doi agns indaûr in plene epoche Covid, e cuvierç dute la zone culinâr e lis Valadis de Tor.
“Vê ospits i fantats des nestris scuelis mediis – al à dit il coordenadôr de ativitât di sede Pierpaolo Rovere – nus à permetût di fâ vivi lôr la esperience di une zornade in Crôs Rosse e di mostrâ in concret trop che al è impuartant il rûl dal volontariât pal nestri teritori. Graciis ai docents e a ducj chei che si son impegnâts pe buine riessude de iniziative. O spietìn ducj i fantats chest Istât pal cors di ingai che al permetarà lôr di deventâ, a ducj i efiets, volontaris de Crôs Rosse”. (A.D.G.) – 27.03.2023
