La Regjon e darà une man ai alpins de Ana par meti a puest lis lôr sedis. Il risultât dal bant dedicât aes sezions de Ana al è stât mostrât vuê a Udin dilunc de conference stampe convocade dal Conseîr regjonâl Markus Maurmair, di Fratelli d’Italia, prin firmatari dal emendament, cu la presince dal assessôr regjonâl aes Infrastruturis Cristina Amirante, che e à judât la iniziative tant di zontâ fonts par rivâ al stanziament di 325 mil euros.
I bêçs a laran par 65 mil euros ae Sezion di Udin, che e judarà i grups dai alpins di Muçane, Torse di Pucinie, Vilegnove e Vilevuarbe di Basilian, indulà che a saran metûts a puest i edificis tirant vie lis barieris architetonichis. Altris 11 mil euros a son lâts invezit tal Friûl Ocidentâl par judâ i lavôrs in vot sedis. A Muimans e a Cividât a rivaran 50 mil euros, intant che altris 90 mil euros a laran a Strassolt, Dael e a Joannis-Palme. Par finî, altris 10 mil euros a son previodûts par Lucinîs. (a.d.g.) – 24.02.2025
