“O sin chi a fâ memorie di personis, chês che a son muartis ai 9 di Otubar dal 1963”, lis “sorevivudis, chês che a àn scugnût lassâ lis lôr cjasis e chês che a àn lotât in maniere valorose par ricostruî, par restâ”. Lu à dit il President de Republiche, Sergio Mattarella, dilunc de cerimonie di memoreament de tragjedie dal Vaiont. Mattarella al à fevelât dai “monuments cidins aes vitimis, a chês soteradis intai cimitieris, a chês sepulidis par simpri intai glereâi dai cors di aghe, su lis clevis: feminis, oms, fruts. Cinccent fruts”. “A son torments che, ore presint – sessante agns dopo -, a conturbin e a interoghin lis cussiencis”.
“O sin li dal Vaiont”, al declare Mattarella, “par podê dî che – cemût che al à esortât il president Zaia – rivâ a sigurâ cundizions di sigurece e garanzie di justizie al reste obietîf di cumò e al è dovût inte nestre societât. Parcè che interessâsi dal ambient, rispietâlu, e je garanzie di vite”. “Par evitâ disposizions di indiference, di presunzion, di superioritât a pet dai segnâi de nature. Paiâts chi presits cussì cjârs. Par no capitolâ a chel che il president Fedriga al à definît “desideri vuarp dal om di pleâ la nature a propri plasiment par otignî il profit massim””. “A un intervent dal om che si tradûs in prevaricazion, al corispuint la violence de nature”, al à afermât il President de Republiche. (a.d.g.) – 09.10.23
