Memoreât vuê a Tarvis dai Carabinîrs l’otantesim prin aniversari dal maçalizi dai 12 coleghis, decorâts cu la medaie di aur al merit civîl, li di Malga Bala che cumò si cjate in Slovenie, tal 1944.
Ae cerimonie e jerin presints il gjenerâl Gabriele Vitagliano, comandant de legjon Carabinîrs “Friuli Venezia Giulia”, Stefano Mazzolini, vicepresident dal Consei regjonâl, il prefet e il cuestôr di Udin, tal ordin Domenico Lioce e Domenico Farinacci, il sindic di Tarvis Renzo Zanette, i parincj dai militârs copâts e i delegâts des associazions.
Il maçalizi al fo opare di partesans che vie pe gnot dai 23 di Març dal 1944 a vevin dât l’assalt ae caserme dongje de centrâl idroeletriche di Bretto di Sotto. Fats presonîrs, i carabinîrs a son stâts puartâts te buinore dai 25 di Març fin te Malga Bala, indulà che dopo a son stâts fusilâts. (a.d.g.) – 25.03.2025
