Un Parc urban, ma ancje un centri di agregazion sociâl e culturâl transfrontaliere. Ancje in viste dal 2025, cuant che Gurize e Nova Gorica a saran clamadis a rivistî il rûl di Capitâl europeane de culture.
Al è ce che al deventarà il Parc Basaglia di Gurize, dopo la opare di rigjenerazion urbane in clâf storic/culturâl che i sarà sometût, come previodût di un protocol di intese siglât intai dîs passâts di Regjon, ERPAC FVJ, Comun di Gurize e ASUGI. Chest sît al è avonde complès, sedi par cemût che al è struturât sedi parcè che identificât di simpri tant che citadele sanitarie, cence contâ che par agns al à sofiert di une gjestion no unitarie. Ma cumò a son une volontât e une progjetualitât comunis de bande dai sogjets firmataris dal citât protocol di intese.
Un acuardi che al à prodot za un “Master Plan”, fondât su la dibisugne di organizâ, caraterizâ e rifunzionalizâ i sedis etars di spazis vierts dal ex Ospedâl Provinciâl Psichiatric e di dâ un strument bon pe gjestion di dut il complès. Al è un document avonde bondant, articolât e ben detaiât, che al conten la progjetazion e il recupar des areis verdis dal Parc e dai percors relatîfs e infrastruturis.
