Il prossim Jugn e partirà la sperimentazion di place Garibaldi a Udin cence machinis, che e larà indevant te Sierade cu la viertidure des scuelis. Lu à anunziât l’assessôr ae Viabilitât Ivano Marchiol îr di sere in Consei comunâl, dilunc de discussion su la variazion dal Belanç trienâl 2024-2026. Marchiol al à dit che i puescj auto cancelâts a saran recuperâts incentivant l’ûs dai trê parcs dongje in struture: Tribunâl, Magrini e Venerio.
Su chest ultin, al à sclarît Marchiol, a saran spindûts 4,7 milions di euros pe sistemazion de struture e la ricualificazion de place sorestante. In particolâr, si previôt di meti vert e banchinis, di là di razionalizâ la viabilitât e la jentrade al parc. L’intervent al sarà finanziât sedi dal Comun (2,7 milions di euros) che di Ssm (2 milions), che al dirotarà i invistiments previodûts pal parc in struture di vie del Vascello. (a.d.g.) – 27.02.2024
