Plui di 20 mil personis al presepi di mosaic

Pe prime volte al à otignût il patrocini dal Consei regjonâl: il ‘ Presepi di Mosaic’ di Spilimberc, fat de associazion Cultura Imago Musiva, al è componût di 30 figuris a grandece naturâl, vistûts su ducj e dôs lis bandis di aurs e smalts di veri venezian colorât. Pe sô realizazion, il progjet al à la poie e la colaborazion di ents publics e privâts che a sostegnin il cost des realizazions, trasformantlu intune opare mestre dal teritori, pal teritori. La opare, iluminade ancje di gnot e fate di 35 diplomâts artesans ae Scuele mosaiciscj di Spilimberc, e je stade visitade fin cumò di plui di 20 mil personis. (A.I.) – 12.01.2023