La gjornaliste Floriana Bulfon e je la vincidore de VI edizion dal “Premio Leali delle Notizie in memoria di Daphne Caruana Galizia”. Floriana Bulfon, di Udin, e scrîf pal setemanâl L’Espresso e pal cuotidian La Repubblica. E je inviade par Rai Uno e e colabore cun Rai Tre. Si interesse di criminalitât organizade, cun atenzion particolâr ae citât di Rome, ma ancje di terorisim internazionâl, pedofilie, cybersecurity. Lis sôs inchiestis plui resintis a indaghin ancje su lis spiis russis intal nestri Paîs.
Di cuant che la gjornaliste maltese Daphne Caruana Galizia e je stade copade intun atentât ai 26 di Otubar dal 2017 par vie des sôs inchiestis gjornalistichis a Malte, la associazion Leali delle Notizie e à decidût di inmaneâ un premi, in plen acuardi cu la famee de croniste, par visâsi di ducj i operadôrs de informazion che, cemût che Daphne, a vegnin menaçâts parcè che a àn il cûr di contâ la veretât e di fâ il propri lavôr in maniere corete e cun professionalitât. La prime edizion dal premi e jere stade vinçude di Federica Angeli, la seconde di Sandro Ruotolo, la tierce di Fabiana Pacella, la cuarte di Paolo Berizzi e la cuinte di Marilena Natale. Floriana Bulfon e vignarà premiade domenie ai 18 di Jugn dal 2023 aes 9 di sere, inte ultime serade de IX edizion dal Festival dal Gjornalisim, che si tignarà a Roncjis di Monfalcon dai 13 ai 18 di Jugn. (A.D.G. – 18.04.2023
