“Premi Pezzarini”: a Buri la memorie e tache des scuelis

Il comitât tecnic dal “Premio Angelo Pezzarini” di Buri, dedicât ae memorie dal paisan sorevivût a 19 mês di presonie e lavôrs di galere intun cjamp di concentrament in Gjermanie, testemoni di chês vicendis dramatichis fin ai ultins agns de sô vite, al à sielt il vincidôr. Il sindic Eliano Bassi e la assessore Patrizia Minen, Valter Pezzarini e Maria Fattori, l’insegnant Debora Driutti a àn selezionât tra i 45 elaborâts chel di Maria Marson, de scuele secondarie di prin grât di Pavie. Menzon speciâl ancje pe cuinte de scuele primarie Dante Alighieri di Buri. In ocasion de Zornade de memorie, i fantats a àn aderît al progjet “Crocus”, plantant rosis in memorie des vitimis dal Olocaust. (A.I.) – 31.01.2023