La associazion “I Donatori del Sorriso onlus” e à regalât un dispositîf medic pe ventilazion no invasive “Bubble c-pap”, al repart di pediatrie dal Ospedâl di Tisane. Si trate di un strument fondamentâl par judâ e stabilizâ i frutins cun problematichis respiratoriis griviis.
Ae cerimonie di consegne, inmaneade tal dopomisdì di martars ai 10 di Setembar, a jerin presints David Turello, diretôr sanitari de Asufc, il diretôr dal ospedâl di Tisane Claudia Giuliani e il diretôr de pediatrie Elisabetta Miorin, adun cun dut il personâl infermieristic dal repart.
Miorin e à ringraciât la associazion: “Ancjemò une volte o dîs graciis al mont dal volontariât che nus jude a miorâ le assistence ai nestris piçui pazients”.
La associazion “I Donatori del Sorriso onlus” e lavore in dute Italie di plui di dîs agns e e à metût in opare cetancj progjets par judâ la assistence ai malâts, soredut a chei che si cjatin intai reparts di pediatrie. (a.d.g.) – 12.09.2024
