La iluminazion publiche di Pordenon e consumarà mancul energjie cu la sostituzion di 11.400 vecjis lampadis che a saran rimplaçâdis di ancjetantis a tecnologjie led.
Il sparagn al sarà dal 73%, ven a stâi di 2,709 milions di kWh par an, che a corispuindin al consum medi anuâl di 1.004 fameis. Il progjet di ricualificazion energjetiche fat di Hera Luce al è stât presentât vuê dai dirigjents de aziende e dal sindic di Pordenon, Alessandro Ciriani.
E je previodude la ristruturazion complete de rêt che e larà indenant cuasi un an cu la sostituzion di plui di 970 pâi de lûs vielis, la instalazion di 124 gnûfs cuadris eletrics, la ricualificazion di plui di 50 chilometris di liniis eletrichis, la instalazion di 17 gnûfs implants pe iluminazion dai passaçs pedonâi, la sostituzion dai semafars cui sistemis a tecnologjie led e la instalazion di centralinis di ultime gjenerazion buinis di analizâ il trafic e – al è stât dit – adatâ la cuantitât di lûs che e covente su la strade. (A.D.G.)-14.04.2023
