“In graciis de ricercje e des gnovis sperimentazions, dal sfuarç, de competence straordenarie, de passion e de abnegazion dai professioniscj de salût e dai ricercjadôrs, i oms e lis feminis, e magari cussì no ancje i fruts e lis frutis maladis, vuê a puedin fâ afidament su curis simpri plui ae avanvuardie, inte lote a un mâl che cuintri di lui o vin simpri plui armis. A son sostanziâi, ricognossûts a nivel internazionâl, i grancj pas indenant otignûts in cjamp oncologjic dal Sisteme sanitari regjonâl intal so complès”.
Lu à sotlineât cheste matine, a Udin, l’assessôr ae Salût dal Friûl-Vignesie Julie, Riccardo Riccardi, intervignût ae presentazion dal Rapuart regjonâl sui 25 agns di regjistrazion dai tumôrs in Friûl-Vignesie Julie, curât dal Centri di riferiment oncologjic (Cro) di Davian, rapresentât dal so diretôr gjenerâl Francesca Tosolini. Ae ilustrazion, tignude inte sede de Regjon a Udin, a àn cjapât part tancj esperts di epidemiologjie, oncologjie e i diretôrs gjenerâi des aziendis sanitariis dal Friûl-Vignesie Julie.
A son plui di 279.000 lis diagnosis di tumôr documentadis intal cors dai 25 agns di ativitât dal Regjistri Tumôrs. I dâts, tirâts sù tra il 1998 e il 2023, a son stâts presentâts cheste matine a Udin, inte sede de Regjon, dilunc di une cunvigne, ocasion par ilustrâ ancje la publicazion speciâl che e fotografe un cuart di secul de Oncologjie in F-Vj. Un percors che al à viodût impegnâts miârs di operadôrs sanitaris di dutis lis dissiplinis e cjapât – in maniere direte tant che pazients o in maniere indirete – cuasi un citadin su doi.
Il Regjistri al è une struture dal Sisteme sanitari regjonâl istituide intal 1998 par cressi la dimension e lis potenzialitâts de preesistente racuelte dâts ative dai agns ’70 inte ex provincie di Triest. Cu la sô estension ae popolazion regjonâl, la gjestion e je stade cjapade in cjame dai epidemiolics dal Centri di Riferiment Oncologjic di Davian, ae lûs de esperience maduride tant che IRCCS ancje intal ambit dai studis internazionâi.
La racuelte e il control di cualitât di dutis lis informazions oncologjichis a son gjestîts traviers di un procès misc, eletronic e manuâl. Un program dedicât – mitût a pont di Sanitât Digjitâl, Insiel Spa e de Aziende regjonâl di Coordenament pe Salût – al cjape sù in maniere automatiche dal Sisteme informatîf regjonâl, intal rispiet dai regolaments su la privacy, i dâts leâts a une malatie oncologjiche intai residents in Friûl-Vignesie Julie. Chestis informazions a vegnin controladis dopo in maniere manuâl di personâl specializât dal CRO di Davian par completece e par cure.
Se intai prins agns ‘90 il Friûl-Vignesie Julie al jere un dai teritoris cu la incidence plui alte di tumôrs – in largje part par stîi di vite nocîfs, tant che il fum e il consum ecessîf di alcul – tra il 2015 e il 2019 il dât tra i oms (677 gnûfs câs ogni 100.000 abitants masculins) al jere plui bas di chel di chês altris regjons dal Nord (730 câs) e dal Centri Italie (699 câs). Situazion tant positive pal cancar dal polmon, cun 79 gnûfs câs/anuâi par 100.000 oms cuintri une medie di 107 al Nord, 100 al Centri e 103 al Sud.
Il miorament, intal cors dai agns, si note ancje pes feminis, si ben che la incidence in F-Vj e risulti ancjemò chê plui alte di Italie, cun 677 gnûfs câs ogni 100.000 abitants a front dai 509 al Nord, 482 al Centri e 424 al Sud. E pese, in particolâr, la alte frecuence dai tumôrs dal pet, dal polmon e dal melanome cutani. Par chestis dôs ultimis neoplasiis, si segnalin, però, diferencis sostanziâls su base teritoriâl, cun numars in maniere significative plui alts intes ex provinciis di Gurize e Triest, leâts a stîi di vite tant che il fum e la esposizion al soreli.
La incidence dai tumôrs dal colon-ret tra i citadins (oms e feminis) dal Friûl-Vignesie Julie e risulte plui basse di chê di chês altris areis talianis, cjapât dentri il Meridion, ancje in graciis de partecipazion al scandai specific ufiert a gratis ae popolazion. (a.d.g.) – 03.10.23
