La maratone di 24 oris dal don dal sanc, inmaneade pe prime volte in Italie de Afds provinciâl di Udin, si è concludude cun 116,4 litris di sanc tirâts sù.
Adiriture 220 i donadôrs rivâts tal ospedâl di Udin di dutis lis 198 sezions, tra chescj 125 sot dai 28 agns. Il prin a donâ al jere stât îr il president provinciâl Roberto Flora, intant che l’ultin a fâlu vuê al è stât l’assessôr regjonâl Riccardo Riccardi. Ve chi altris numars: su 220 donadôrs a son risultâts abii 210, disore de medie fisiologjiche; 137 a àn donât sanc intîr e 73 plasme. Pe buine riessude de imprese e je stade determinante la disponibilitât dal personâl sanitari de Asufc, in particolâr dal Centri trasfusionâl dal Ospedâl di Udin, che al à impegnât 6 miedis, 18 infermîrs e 3 impleâts.
“La partecipazion ae maratone, ancje di gnot, al à maraveât ancje nô – al à comentât Flora -, i volontaris a àn rispuindût benon e, in particolâr, i zovins che di lôr e je rivade la idee. Di Udin al è partît cussì un segnâl tant grant a dut il Paîs, no dome in tiermins di sanc tirât sù, ma soredut su la collaborazion tra volontariât e sisteme sanitari e sui risultâts che cheste e pues puartâ”. (A.D.G.) – 15.06.2023
