“La comunitât dal Friûl-Vignesie Julie e à dimostrât ancjemò une volte la sô grande gjenerositât partecipant ae campagne di racuelte fonts di Despar intal periodi nadalin, intal 2020. In chel an, cussì dûr e dificil, segnât dal Covid, la popolazion de nestre regjon e à incressût lis donazions, a riprove che intai moments di dificoltât, intes nestris tieris al prevâl il spirt di aiût viers di cui che al à bisugn”.
A son lis peraulis dal vicegovernadôr dal Friûl Vignesie Julie cun deleghe ae Salût Riccardo Riccardi, presint cheste matine al paveon 15 dal ospedâl Sante Marie de Misericordie di Udin dilunc de presentazion dal risultât dal progjet “Un Nadâl di donâ ae comunitât, gracie Despar”.
In graciis de iniziative di racuelte, in ducj i 80 ponts vendite dal Friûl-Vignesie Julie di Despar, Eurospar e Interspar (Aspiag Service), e lis buteghis afiliadis, a son stâts tirâts sù plui o mancul 130 mil euros, midiant plui di 270 mil “microdonazions”, otignudis in graciis de staronzade sul scontrin in casse.
“Une iniziative meritevule e laudabile che e à vût un dopli benefici: chel di judâ cui che al è intal stât di bisugn e ancje la struture sanitarie de Sante Marie de Misericordie – al à sotlineât Riccardi -. Cu la sume donade da citadins, di fat, a son stadis acuisidis ciertis aparecjaduris impuartantis dopradis di chirurcs e di gastroenterologi pe cure dai lôr pazients. Un ringraciament dovût al va ae aziende che e à ideât il progjet e a ducj chei che a àn aderît ae racuelte”. (A.D,.G.) – 16.01.2023
