Lis bancjis (e no dome lôr) no fasin plui lis agjendis. Intune ete leade dal dut ae cjarte, sot Nadâl chest al jere un presint che la int si spietave. Al jere un imprest util, che al coventave par notâsi di dut: dai impegns di vore, a lis spesis fatis vie pal mês, cussì di tignî sot voli il tacuin de famee. Tai ultins agns, sedi par vê cjapât simpri plui pît i imprescj tecnologjics, sedi par il tai dai coscj fats des aziendis, lis agjendis pal an che al ven a son deventadis raris, par no dî che a son sparidis dal dut.
E no! Une e reste vive e vivarose, forsit simpri di plui: la nestre agjende. E vignarà dade fûr intes ediculis di vinars ai 13 di Dicembar e ancje chest an, pe seconde volte, e je dedicade ai puescj plui biei de nestre regjon, di vivi mês par mês. E pues sugjerî, in plui, dulà lâ in gjite tal fin di setemane o ancje par une vacance plui lungje. Di S. Denêl a Maran, di Cividât a Plan dal Cjaval, des monts des Dolomitis furlanis a Palme, cence dismenteâ Sapade e Triest… In 365 pagjinis us fasìn zirâ dut il Friûl-Vignesie Julie. In plui, une biele gnove: vie pes setemanis dal an a son segnâts i apontaments (ricorencis, fiestis, sagris, garis, events) plui impuartants, cussì di no pierdi un colp.
La agjende 2025 dal grup Mediafriuli, che al e’ il proprietari di chest gjornâl, e je stade fate cul jutori di PromoturismoFvg e soredut cun tancj sponsor che a àn permetût la sô stampe e il so regâl ai nestris letôrs. (r.c.) – 10.12.2024
