Ai 16 di Març dal 2023 la Unitât Senologjiche dal Ospedâl di Udin e à vût la conferme de certificazion EUSOMA (European Society of Breast Cancer Specialists) tant che centri european di ecelence pal tratament dal cancar mamari.
La Unitât Senologjiche dal Sante Marie de Misericordie e je in ativitât di agns: la sô costituzion uficiâl e je rivade cuntun decret dal diretôr gjenerâl intal Març dal 2021 e intal Mai dal stes an e je stade otignude la prime certificazion, confermade intal 2022 e cumò chê gnove ai 16 di Març. Dome intal 2022 e à tratât 360 gnûfs câs di tumôr cuntun totâl di 648 intervents chirurgjics.
Il tumôr dal pet al è la neoplasie plui frecuente intes feminis, in Italie a son plui di 50.000 câs ad an, che plui o mancul 1.200 in Friûl-Vignesie Julie. Intai ultins agns, cundut dal aument de incidence, il tas di mortalitât al continue a lâ jù planc; la diagnosi simpri plui precoç in graciis dai programs di scandai e dai struments diagnostics simpri plui sofisticâts adun cu lis terapiis simpri plui zovevulis e smicjadis a àn miorât simpri di plui la prognosi. (A.D.G.) – 27.03.2023
