La Scuele superiôr di Toppo Wasserman de Universitât dal Friûl e je stade finanziade cuntun milion e 285 mil euros dal Ministeri de Universitât e de Ricercje par rinfuarcî lis ativitâts didatichis e di transizion de scuele ae universitât.
Al à visât di chest vuê il diretôr dal istitût di ecelence dal Ateneu furlan Alberto Policriti, dilunc de scree dal vincjesim prin an academic 2024-2025. Te stesse cerimonie a son stâts consegnâts ancje i titui ai 22 arlêfs che a àn finît il percors di studi tal an academic passât. La scuele e à cumò 89 arlêfs e de sô istituzion tal 2004 e à diplomât 185 zovins, che cumò a fasin lavôrs impuartants in aziendis publichis e privadis in dut il mont.
Chest istitût di ecelence al è judât ancje de Regjon Friûl-Vignesie Julie cu la Agjenzie regjonâl pal dirit al studi (Ardis) e de Fondazione Friuli. (a.d.g.) – 14.03.2025
