Un ulivâr a Lignan pal “Bosc dai Juscj”

Seconde tape, martars ai 15 aes 10 di buinore, pal “Bosc dai Juscj in Friûl-Vignesie Julie”, il progjet ideât e promovût di Damatrà cu la Regjon F-Vj. Pal secont an, in cetancj centris de regjon, i arbui de memorie a saran intitulâts a citadinis e citadins esemplârs dal mont, i “Juscj”, apont, cul obietîf di promovi un gnûf “umanisim” che al incrose i valôrs de sostignibilitât e i dirits di ogni persone. Il progjet si sposte a Lignan par une gnove iniziative proponude in colaborazion cu la Aministrazion comunâl: intal parc de Scuele Primarie “Ippolito Nievo”, un ulivâr al sarà dedicât a Felicia Bartalotta Impastato, la mari dal gjornalist Peppino Impastato, che dopo il sassinament dal fi de bande de mafie no à mai molât di cirî justizie fint ae sô muart, intal 2004. Ae intitulazion a parteciparan 60 students, che in chescj mês a son stâts dentri dal progjet adun cui lôr insegnants. (A.I.) – 14.04.2025