Une ‘Adunade dai furlans’ a Teôr

Seconde “Adunade dai Furlans”, in ocasion de Fieste de Patrie dal Friûl, sabide ai 5 di Avrîl dal 2025 a Teôr tal dopomisdì. Dopo il sucès de prime edizion dal an passât, i organizadôrs a tornin cun braùre a proponi cheste manifestazion dal caratar identitari, destinade al Friûl e ai furlans, sperant che e podedi cjapâ ancjemò plui pît e vê un sucès simpri plui grant. Par cheste edizion al sarà l’atôr Claudio Moretti a screâ e a presentâ l’event, ma e sarà ancje une schirie di ospits di spic dal mont de culture e dal sport, tant che Angelo Floramo, Diego Navarria, la Associazion Sportive Furlane, i campions olimpics Mara Navarria e Davide Franceschetti e, vie pe serade, il conciert dai FLK, dongje di altris iniziativis culturâls e no dome. La filosofie de fieste e je chê di tirâ dentri gjenerazions diviersis, ma ativâ un cercli virtuôs che al sedi bon di inzornâsi ancje pes edizions futuris, soredut in gracie dal apuart dai zovins. (A.I.) – 04.04.2025