Une cjase par meti dongje e supuartâ lis fameis cun minôrs fragjii par proteziju e supuartâju par lâ fûr dal moment dificil. E je la funzion de cjase di Pippi che e cjatarà puest dentri di pôcs dîs inte palacine dal comandant li de ex caserme Osôf a Udin.
Il program P.I.P.P.I. al è un model di intervent coordenât dal Servizi Sociâl di ambit, adun cun aziende sanitarie, scuelis, ents dal Tierç setôr e si indrece aes fameis in dificoltât te gjestion e te cressite dai propris fruts. L’obietîf al è sostignî cuntune impostazion di scuadre, par evitâ che la famee e vedi des carencis significativis o une assence di rispuestis ai bisugns di un frut, par ridusi il pericul di deviance e di maltratament e il slontanament consecuent dai fruts dal nucli familiâr di origjin. Il program al è promovût dal Ministeri dal Lavôr e des Politichis sociâls, che al à funzions di aministrazion.
Traviers une cumbinazion di intervents di formazion specifiche dai operadôrs e di dispositîfs a pueste, il program al ponte a sostignî chestis fameis, cuntune rêt di personis e di servizis che lis assistin intal cjatâ lis risorsis par miorâ la cualitât de vite dai lôr fruts, garantint lôr lis justis cundizions di sigurece e di cressite.
L’ambit teritoriâl al à ativât chest program za intal 2018 e di alore a vuê al à supuartât plui o mancul une sessantine di fameis cun fruts fin ai 11 agns, cuntune particolâr atenzion pai piçui fin ai 3 agns. (a.d.g.) – 20.09.23
