La Capitâl europeane de culture Nova Gorica-Gorizia e sarà screade ai 8 di Fevrâr dal 2025. L’anunzi al è stât dât miercus ai 8 di Fevrâr in contemporanie a Lubiane, dal ministri sloven ae Culture Aste Vrečko, a Rome, dal ministri talian de Culture, Gennaro Sangiuliano, a Nova Gorica dal diretôr di Zavod 2025, Gorazd Bozič e a Gurize dal sindic, Rodolfo Ziberna, intune cul assessôr regjonâl ae Culture, Tiziana Gibelli e ae diretore dal Gect Go, Romina Kocina.
Nol è un câs che a sedin presints in prime persone i doi ministris: e je la conferme che il titul assegnât a Nova Gorica e Gurize al va ben di là des carateristichis locâls e al cjape a bracecuel doi intîrs Paîs, la Slovenie e la Italie. E ancje di plui. Parcè che, cemût che al à visât ancje il ministri Sangiuliano intal so messaç, let dal sindic Ziberna, “di chest confin e je passade la storie de Europe”. (A.D.G.) – 08.02.2023
