YoupalTubo al è il canâl YouTube cun protagoniscj un grup di fantats furlans. Midiant dal canâl, une vore preseât dai lôr coetanis (si contin passe 9.500 iscrits e plui di 20 mil oris di visualizazion), a contin lis lôr passions, cun contignûts e curiositâts sul Friûl. Tal video presentât vuê in Regjon, i vot youtubers furlans a àn volût metisi in zûc suntun teme impuartant: trasmeti ai lôr coetanis la impuartance di salvâ une vite graciis ae donazion di medole dai vues. Come simpri, il lôr stîl al è lizêr, ma il teme al è dal dut seri e i fantats lu frontin cun sensibilitât: pe Admo al è fondamentâl rivâ ai fantats e aes fantatis fra i 18 e i 35 agns, in buine salût e cuntun pês sore dai 50 chilos. La sielte di fâlu in colaborazion cu la Arlef e la clape di YoupalTubo “e je peade ae pussibilitât di vierzi un altri canâl di dialic cui zovins che al partissi propit di lôr- e à marcât Paola Rugo, presidente de Admo Fvg che e je impegnade sul teritori intune vore di ativitâts, tant che lis cunvignis intai istitûts scolastics -. Il canâl YouTube nus à parût subit un strument bon par vê un contat cun pussibii gnûfs donadôrs di medole dai vues. I fantats di YoupalTubo a àn realizât une clip che e rivarà al cûr dai lôr coetanis, fasintjur capî che nol è nuie ce vê pôre ma che, al contrari, notâsi tal regjistri dai donadôrs al rapresente un at di gjenerositât e une grande pussibilitât, ven a stâi chê di salvâ une vite. O dîs graciis ae ARLeF e ai fantats par cheste oportunitât e o invidi ducj a cjalâ il video par savêndi di plui”.
«La colaborazion cun Admo Fvg e je nassude di un pôc di timp – al à ricuardât il president de Arlef, Eros Cisilino -. Si trate di une associazion che e fevele cui zovins, par chest o crôt che il video realizât dai fantats di YoupalTubo al sedi un contribût valit tal pandi il messaç de impuartance de donazion di medole dai vues e par judâ a incressi ancjemò di plui la cussience su chest argoment”. (A.D.G.) – 06.02.2023
