Ai 21 di Març si celebre la Zornade internazionâl des forestis, istituide intal 2012 des Nazions Unidis par aumentâ la cussience de impuartance che chestis a àn pe salût dal nestri planet. Propit in chescj dîs, Legno Servizi al à terminât la distribuzion des primis 200 copiis dal libri di Luigi Torreggiani “Il mio bosco è di tutti”, publicât de Compagnia delle Foreste. Cheste iniziative, pussibile in graciis de racuelte dai fonts di “Palchi nei Parchi 2022”, rassegne culturâl ideade e finanziade de Regjon F-Vj, e à interessât dutis lis scuelis secondariis di prin grât de regjon. Altris cent copiis a saran donadis intai mês prossims aes bibliotechis scolastichis dilunc di incuintris di sensibilizazion e animazion dreçâts ai fantats, secont un program in cors di definizion.
“Di simpri o sin in prime linie inte promozion e divulgazion de culture forestâl – al aferme il president di Legno Servizi, Carlo Piemonte – e, cussients dal rûl centrâl che al rivistìs la scuele inte formazion di citadins responsabii e cussients, o vin volût meti a disposizion di docents e students chest strument par podê disveâ fin de etât plui zovine l’interès viers il propri teritori e la cussience de impuartance di une gjestion sostignibile des forestis”.
Gjestî une foreste in mût sostignibil, cemût che al è visât ancje des Nazions Unidis che par chest ai 21 di Març dal 2023 a àn sielt tant che teme puartant “Forestis e salût”, al jude di fat a frontâ lis crisis leadis al clime e ae pierdite di biodiversitât, di là di produsi bens e servizis par un disvilup economic sostignibil che al cree puescj di vore e al miore la cualitât de vite des personis. (A.D.G.) – 20.03.2023
