A fûc la cane di un camin a Cjasarse

Pôc dopo lis 8 di vuê di buinore, la sale operative dal comant des Vuardiis dal fûc di Pordenon e je stade alarmade pal fûc di une cane fumarie a Cjasarse. Daurman a son stadis inviadis lis scuadris dai distacaments di S Vît dal Tiliment e Codroip supuartadis di une autobote, une autoscjale e il Funzionari di vuardie de sede centrâl di Pordenon.

Rivâts sul puest, i pompîrs a àn studât lis flamis che, alimentadis dal aiar, a vevin scomençât a intacâ ciertis trâfs e l’isolament dal cuviert de abitazion. (A.D.G.) – 28.02.2023