Fugaron di gnot a Buie, dulà che lis flamis de cane fumarie si son propagadis al cuviert e ae mansarde di une abitazion. Gjenitôrs, nonos e nevôt a son stâts metûts in salf dal fûc che si è propagât in curt a sottet e in mansarde. Numerosis lis scuadris des Vuardiis dal Fûc intervignudis in vie Cuartae, a Buie, dulà che lis flamis a àn tocjât ancje il prin plan. E je stade declarade inagjibile la mansarde. I dams a son grancj.
Lis operazions di distudament dal fugaron e di bonifiche si son conclududis cheste matine aes 8. Îr di sere a Trasaghis, invezit, i pompîrs a son intervignûts par une sovratension de linie dal implant fotovoltaic in vie Barcis: par vie de cjadude di cualchi arbul, dut il cuartîr al jere restât tal scûr. Il vuast al è stât riparât a colp. (A.D.G.) – 08.03.2023
