A fûc une cjase a Tresesin vie pe gnot

Al è partît de cane fumarie il fûc che si è impiât cheste gnot intune abitazion di Tresesin, in localitât Colgallo. L’alarme al è rivât pôc dopo la miezegnot in vie Zorutti, cuant che lis flamis e il fum a àn scomençât a invadi la cusine e ciertis stanziis dongje, intosseant in maniere lizere i trê ocupants: mari, pari e fi minôr, corûts fûr di cjase in spiete dai socors.

Ae rivade dai sanitaris, la famee e je stade traspuartade tal ospedâl di Udin pes verifichis dal câs. Ducj a son stâts dimetûts cualchi ore dopo. A stan ben, ma no podaran jentrâ in cjase. Il stabil, di fat, al è stât declarât inagjibil. Sul puest a àn operât a dilunc des vuardiis dal fûc. Presints ancje i carabinîrs. (a.d.g.) – 15.01.2024