Al nassarà a Glemone il gnûf centri regjonâl dal Socors alpin e speleologjic (Cnsas) dal Friûl-Vignesie Julie, intune localitât baricentriche te nestre regjon.
A comunicâlu al è stât, cheste matine, il vicegovernadôr cun deleghe ae Protezion civîl dal Friûl-Vignesie Julie Riccardo Riccardi, disint che il teme al sarà puartât ae atenzion de Zonte intai dîs che a vegnin, in particolâr par un stanziament di 200 mil euros – midiant la Protezion civîl – pe ristruturazion di un imobil dismetût di tancj agns, vuê di proprietât dal Comun, che si cjate in vie Osôf.
Intal sotlineâ la impuartance de ativitât fate dal Cnsas, Riccardi al à sclarît che al è un dai tassei che al jentre intun program di invistiments struturâi che a interessaran plui areis sensibilis de regjon, tra chês il Tumiecin. (A.D.G.) – 25.02.2023
