L’alt numar di incidents dilunc de Çumpiel – Secuals al è stât al centri di une riunion dal Comitât provinciâl pal ordin e la sigurece in Prefeture a Pordenon.
Ae incuintri cul Prefet Domenico Lione, a jerin presints lis fuarcis dal ordin, i sindics dai Comuns di Flum Venit, Sant Zorç de Richinvelde, Secuals, Voleson Darzin e Çopule, l’assessôr ae sigurece di Spilimberc, il vice president de Cjamare di Cumierç di Udin-Pordenon, i rapresentants de Regjon e i referents di Fvg Strade.
I prins citadins a àn proponût intervents mioratîfs de infrastruture cul inmodernament de segnaletiche verticâl e il ripàs di chê orizontâl par fâle plui facil di viodi, soredut in prossimitât dai svincui. Al è stât, cun di plui, domandât un infuartiment des ativitâts di manutenzion e sfalç dal vert ancje par miorâ la visibilitât. Su chestis propuestis si è regjistrât l’impegn di Fvj Stradis.
Il Prefet al à anunziât l’inseriment de Çumpiel – Secuals intal decret prefetizi che al individue lis stradis là che a puedin jessi instalâts i autovelox, cence la presince dai operadôrs di polizie. I implants a saran in vore in ducj i doi i sens di marcje e si metaran dongje des ativitâts di prevenzion e contrast fatis des fuarcis dal ordin che, propri in graciis di cheste ativazion, a podaran concentrâ i controi in altris ponts sensibii. (ADG) – 9.11.2022
