A Tierç di Aquilee 300 citadins cuintri il parc agrivoltaic

Tierç al dîs di sì ae energjie nete e verde, che e nas des fonts rinovabils, ma al è cuintri sedi ai parcs fotovoltaics a tiere che si volaressin costruî intes sôs areis boschivis e rurâls par une cincuantine di etars, sedi al consum indiscriminât di teren. Se parc al à di jessi, che al sedi disfrutant terens no produtivis tant che ex gjavis, ex casermis, terens intosseâts, o che si disfrutin i cuvierts dal municipi, des struturis sportivis, dai capanons e des scuelis, ma che si lassedin stâ i cjamps agricui.

Chest al è il parê di 300 citadins di Tierç contignût inte petizion presentade ae presidence dal Consei regjonâl dal Friûl Vignesie Julie. (A.D.G) – 24.05.2022