Di lunis ai 7 di Avrîl a Udin a saran presints plui agjents intes zonis plui frecuentadis e consideradis a risi. Cun di plui, in prevision des fiestis pe Pasche, dai 25 di Avrîl, dal Prin di Mai e dal Luna park intal Zardin Grant, fintremai ai 2 di Jugn cuant che e sarà la Fieste de Republiche, a saran tornadis a meti in vore lis Zonis rossis inte citât.
La decision e je stade cjapade vuê di matine dal Comitât pal Ordin e la Sigurece che si è dât dongje inte Prefeture.
Polizie locâl, patuliis di carabinîrs e Polizie di Stât, adun cul personâl dal Repart prevenzion crimin a controlaran ancje il Zardin Grant e i baracons fin ai 21 di Avrîl. A saran ancje rinfuarçâts i servizis di sigurece za in vore tal Borc de Stazion, in vie Buttrio, vie Giulia, tal centri storic.
Di chi a pôc al tacarà ancje il servizi di control des vuardiis zuradis dentri dai bus di linie dentri e fûr de citât. Il presidi di Polizie locâl di viâl Leopardi al restarà viert fin ae miezegnot a pene che al sarà inmaneât il servizi slungjât. (a.d.g.) – 02.04.2025
