La Procure de Republiche di Udin e à notât intal regjistri dai indagâts il sindic di Udin Alberto Felice De Toni e l’assessôr comunâl ai Lavôrs publics e ae Mobilitât Ivano Marchiol pe ipotesi di reât di coruzion eletorâl. La iscrizion e je rivade daspò dal espost fat tal Jugn dal an passât di 12 conseîrs dal centridrete.
Al centri dal espost al jere l’acuardi eletorâl firmât di De Toni e Marchiol, ducj i doi candidâts come sindic, daspò des elezions dai 2 e 3 di Avrîl dal 2023. Prime de balotazion dai 17 di Avrîl, cuant che si son frontâts De Toni e Fontanini, i doi a vevin firmât in public un document politic–programatic di intese. E za in chê volte De Toni al veve fevelât di “resonament su lis deleghis in câs di vitorie”.
Dopo des elezions, Marchiol e Chiara Dazzan a son jentrâts te Zonte comunâl di Udin, ma fin di chê volte il centridrete al veve tirât fûr la cuistion de legjitimitât di chel acuardi, parcè che secont lôr De Toni e Marchiol si jerin leâts ancje cence imparintâsi in maniere formâl, tirant vie cussì doi conseîrs ae minorance, fat che al viole lis proporzions previodudis de leç che a son 60% ae maiorance e 40% ae minorance. (a.d.g.) – 10.01.2025
