A vadin sul Lusinç par rilassâsi e si cjatin sierâts intor des aghis

Doi zovins si son cjatâts di un moment a chel altri sierâts intor des aghis dal Lusinç e a àn scugnût clamâ daurman il 112.

Al è sucedût îr tal dopomisdì, cuant che lis aghis dal flum a àn tacât a lâ sù une vore di corse daspò che la dighe di Salcan e jere stade vierte cence visâ nissun, come che al sucêt une vore dispes. I doi si cjatavin a un ciert pont suntune isulute tal centri dal flum, pôc lontan dal puint VIII agosto, cence rivâ a tornâ indaûr.

Tor des sîs sore sere a son rivâts i pompîrs dal comant di Gurize adun cui socoridôrs fluviâi che ju àn cjariâts suntun gomon pal rafting e ju àn puartâts li de rive cence une sgrifade. (a.d.g.) – 08.04.2024