La Polizie di Stât di Pordenon, joibe ai 16, vinars ai 17 e sabide ai 18 di Fevrâr, e à fat servizis straordenaris di control dal teritori, cul implei di ecuipaçs dal “Reparto Prevenzione Crimine Veneto” di Padue e di ecuipaçs de Cuesture di Pordenon.
La ativitât straordenarie di control dal teritori in ambit provinciâl si è zontade a chê des patuliis de “Squadra volante”, par prevignî e contrastâ il spaç di droghis, la imigrazion clandestine e i reâts cuintri il patrimoni, in particolâr lis robariis in abitazion e intes ativitâts comerciâls. Controladis ancje lis zonis verdis e i parcs a Pordenon e intai comuns di Davian, Cordenons, Purcie, Lavorêt, Flum Venit e Fontanefrede.
Martars ai 14 e joibe ai 16 di Fevrâr a son stâts fats controi zontâts cu lis patuliis de “Squadra volante” e dal Cuarp Intercomunâl de Polizie Locâl dai Comuns di Pordenon e Cordenons, metint une atenzion particolâr intes zonis di agregazion o frecuentadis di zovins.
In dut a son stadis controladis 156 personis, 49 veicui e 5 esercizis publics.
La ativitât straordenarie di control dal teritori in colaborazion cu la Polizie Locâl dal Comun di Pordenon e sarà ripetude intes setemanis prossimis. (A.D.G.) – 20.02.2023
