Grau inagade, stradis dal centri trasformadis in flums. Un avigniment no gnûf pe Isule dal soreli ma, a diference di chês altris voltis, il fenomen de aghe alte, che il so pic al è stât di un metri e 66, al è rivât cheste matine prime dal previodût.
La aghe e à scomençât ae albe a passâ lis banchinis dal puart, invadint planc a planc il centri abitât e lis viis dongje. Emblematiche la imagjin di cualchi resident che, par movisi, al à doprât une canoe.
Lavôr super pai volontaris de Protezion civîl, che a àn sierât ciertis stradis, di fat impraticabilis. Interdete la circolazion su la regjonâl 352 translagunâr, cun deviazion viers Boscat.
Discomuts ancje pes scuelis: intant che i scuelebus comunâi a àn puartât in maniere regolâr i fruts intes classis, i bus de Apt no son jentrâts in centri obleant i fantats a tornâ a cjase.
Colpidis fuart de ondade di brut timp ancje lis areis di Marine Julia, Marine Nova e il lît di Staranzan.
Confermade pe zornade di vuê, su dute la Regjon, la alerte meteo zale e narancine che, tant che previodût, il brut timp al è daûr a causâ dams e discomuts.
Pic di maree rivât a Lignan, la Protezion civîl e je daûr a monitorâ ancje la situazion a Tarcint dulà che e reste sierade la cjaminade parsore il torint Tor. (a.d.g.) – 27.10.23
