Par vie dai alts nivei di incuinament previodûts pai dîs che a vegnin, di lunis ai 2 di Zenâr e fin a gnove comunicazion a Pordenon e in chei altris 13 comuns interessâts – Daçan Decim, Cjasarse, Cordenons, Cordovât, Flum Venit, Morsan des ocjis, Pasian, Purcie, Prate, Lavorêt, Sant Quarin, Sant Vît dal Tiliment e Çopule – al è partît il plan antismog.
Lis misuris a rivuardin la temperadure impuestade dentri dai edificis, che e à di jessi al massim di 20 grâts in abitazions, uficis, sedis di ativitâts ricreativis, di cult, sportivis e assimilabilis; massim 18 grâts in edificis dulà che si fasin ativitâts industriâls, artesanâls e assimilabilis. A son esentâts i edificis in categorie B o superiôr su la base dal atestât di cualificazion – prestazion energjetiche e i edificis come ospedâi, clinichis, cjasis di cure, cjasis di polse, centris diurnis, scuelis e abitazions là che a stan personis tocjadis di malatiis cronichis.
Cui che al dopre sistemis di combustion domestiche dai lens (çocs o pellet), al à di studâju e doprâ altris formis di combustibile o riscjaldament, a mancul che nol sedi chest l’unic sisteme par scjaldasi. A son esentâts i dispositîfs cun marcadure CE e carateristichis emissive descritis intal plan anti smog.
Si vise ancje che a Pordenon a son in vore i limits ae circolazion dentri dal ring pai veicui plui incuinants dai 15 di Otubar ai 7 di Dicembar e dai 15 di Zenâr ai 31 di Març, des 16 aes 20, sabide escludude. (A.D.G.) – 3.01.2023
