Al è muart di infart, sul cricà dal dì, dongje de stazion feroviarie di Udin dulà che al stave par cjapâ un tren par tornâ a cjase, in Austrie. Al è sucedût a un tifôs dal Napoli che îr di sere al jere a Udin pe partide che cun chê il Napoli al à vinçût il scudet. Il decès al è sucedût tor lis cuatri di vuê a buinore.
Dopo lis clamadis rivadis al 112 di bande di cualchi persone che lu à viodût colâ par tiere – e riferìs la Sores – i operadôrs de sale operative a àn inviât sul puest une ambulance e une machine di emergjence mediche.
Il personâl sanitari al à inviât lis manovris di rianimazion, ma dibant. L’om, di ce che si è savût, za in passât al veve vût problemis di salût. Al è muart in strade, a pôcs pas de jentrade de stazion, dulà che al jere daûr a lâ par cjapâ un tren par tornâ a cjase in tren dopo la partide.
I agjents de Polizie di Stât di Udin a son daûr cu lis investigazions dal câs. (A.D.G.) – 05.05.2023
