Ancjemò une tragjedie su la mont furlane. Cheste matine un om di 82 agns, G.P., resident intal Cjanâl dal Fier, al è muart dopo jessi colât par plui o mancul cent metris intune scarpade, su la cueste nord de mont Agar, intal comun di Pontebe. Lis feridis ripuartadis inte colade, sucedude a plui o mancul 1.500 metris di cuote no lontan di Malghe Jeluz, no àn lassât redenzie al anzian, forsit inçopedât e tombolât lunc jù une cleve sverdeade nassude dopo un vecjo slac. A dâ l’alarme al è stât un amì che al acompagnave l’anzian.
I doi oms, cun di plui, a jerin insiemi cuntun tierç escursionist, ducj cjaçadôrs, intune aree che e je risierve di cjace. Intant che il fradi al coreve ae Malghe par fâsi viodi dai socoridôrs, la tierce persone si è puartade li dal om colât cirint di rianimâlu cul aiût dai infermîrs de Sores che lu vuidavin par telefon. Ae rivade dal elisocors e je stade disbarcjade cu la binte la equipe tecniche sanitarie al complet su la cleve erte, ma il miedi nol à podût fâ altri che constatâ il decès, sucedût dopo dai traumis ripuartâts inte colade. L’elicotar al à imbarcjât duncje i socoridôrs dal Socors Alpin e un financîr socoridôr e ju à calâts cu la binte sul puest pal recupar dal cadavar, recuperant cun di plui la equipe tecniche sanitarie. (a.d.g.) – 22.08.23
