Al piert il control dal so auto dilunc de Pontebane e al finìs intal fossâl

Un om di plui o mancul 70 agns di etât al è stât socorût chest dopomisdì pes feridis ripuartadis intun incident stradâl fat dilunc de statâl 13 Pontebane, intal trat tra Glemone e Dartigne, pôc prime dal locâl public “Ae Ledre”.

Par causis in cors di aciertament, l’om al à pierdût il control de veture che e je finide intal fossâl a ôr strade. L’incident nol à cjapât altris veicui.

Mandadis daurman sul puest une ambulance di Glemone e une scuadre di Vuardiis dal fûc. Ae rivade dai socors l’om al jere saltât fûr di bessôl dal abitacul. Al è stât traspuartât in codiç zâl precauzionâl intal ospedâl di Tumieç. (A.D.G.) – 03.03.2023