Completât in vie Ascoli 16, intal centri storic di Gurize, l’intervent di recupar dal edifici inte zone dite par antîc “Comunitât dal Ghet”, indulà che a son stâts rigjavâts 6 apartaments di edilizie residenziâl publiche sovenzionade, che un destinât a personis puartadoris di disabilitât e progjetât daûr dai criteris fissâts de normative in vore e logât al plan tiere.
L’intervent – pajât in dut 935 mil euros che 557.800 euros a cjame di Ater Gurize e 377.200 euros cuvierts di contribût – al à permitût la ristruturazion de part interne dal edifici, lade jù in maniere progressive fin a rivâ a cundizions di pericul pe incolumitât publiche. La part dal stabil devant la vie publiche e jere invezit za stade ristruturade intal 1986, tirant fûr 6 apartaments e une buteghe. (ADG) – 22.09.2022
