Fûc ancjemò impiât sul Mont Cimadôrs, parsore Mueç, indulà che di cetancj dîs si cîr di distudâ lis flamis tacadis ai 19 di Avost.
Vuê a son in vore doi elicotars dal Servizi de Protezion civîl regjonâl e doi Canadair che a àn tacât a svolâ dome vie pe matine par cause de mancjance di visibilitât. Simpri vie pe matine pai doi avions al è stât domandât il permès di tirâ su’ la aghe dal lât Weissensee in Carinzie.
I volontaris des scuadris AIB (Anti incendio boschivo) di Dartigne, Cividât, Enemonç, Glemone, Montenârs, Pontaibe, Tresesin, Vençon e Mueç a àn preparade une linie di vascjis plenis di aghe pai elicotars.
Par cumò il fûc al à fiscât 450 etars di teren, ma si spere che la ploie che e varès di rivâ intai prossims dîs e puedi judâ a distudâ lis flamis. (a.d.g.) – 03.09.2024
