Amidarie di Rude: a tachin i lavôrs pal restaur

Il sindic di Rude, Franco Lenarduzzi, al sotscrivarà joibe ai 4 cu la imprese Sicea di Vigonza (PD) il contrat pe esecuzion dai lavôrs di restaur e ricualificazion de ex Amidarie Chiozza di Parteulis, secont il progjet aprovât a fin Dicembar 2022. “L’intervent di restaur e recupar de Amidarie – al sclarìs – al è tra i intervents di archeologjie industriâl plui impuartants su dut il teritori talian e al smire a creâ grandis oportunitâts ancje pal avignî di dut il teritori regjonâl, cjalant sedi aes oportunitâts di atrat culturâl che di disvilup di ordin economic”. I lavôrs, par un impuart di plui o mancul 4 milions di euros, a previodin une sostanziâl messe in sigurece des struturis de Amidarie, vuê comprometudis in maniere serie e malsiguris, e inte realizazion, intai spazis dal vecjo mulin, di un toc dal futûr museu di archeologjie industriâl. (A.I.) – 03.05.2023