La tasse su la scovace intal 2023 e cressarà ancje a Udin. Auments medis dal 2,7% a son previodûts pes utencis domestichis. Auments plui grancj, invezit, a colpiran lis ativitâts comerciâls, cun auments medis fin al 6,7%.
Propit par vignî incuintri aes utencis comerciâls, il Comun di Udin al à previodût, di là dal stanziament di 100 mil euros za in belanç, une altre deviazion di belanç di 500 mil euros.
“Cussients des dificoltâts che a puedin jessi creadis dal aument de Tari, o vin decidût di previodi un stanziament a pueste pes ativitâts economichis, di là di chel za presint in belanç – e declare l’assessôr ai Tribûts Gea Arcella -. Lis utencis domestichis no patiran invezit grues cambiaments e anzit, i nuclis componûts di un individui singul a podaressin fintremai beneficiâ des gnovis tarifis.”
Al passe i 14 milions di euros il bisugn anuâl des utencis presintis in Comun di Udin. In graciis des riduzions e des agjevolazions previodudis, al larà jù invezit a plui o mancul 13 milions e 300 mil euros il cost net di cuvierzi cu la tarife, ripartît intal 53% pes utencis domestichis e intal 47% par chês no domestichis. (A.D.G.) – 17.05.2023
