Dopo che za il Comun e la Fondazion Aquilee a vevin dât cuintri al progjet, cumò ancje il ministeri de Culture al à palesât la sô oposizion ae costruzion di un implant fotovoltaic inte localitât San Zili – Casa Bianca, che si cjate dongje de zone fate par tutelâ il sît archeologjic de citât imperiâl e la basiliche patriarcjâl.
A comunicâlu al è stât il ministri pai Rapuarts cul parlament, Luca Ciriani, che al à ancje sotlineât che il ministeri de Culture al à za inviât lis proceduris par tutelâ il patrimoni Unesco. “O ringracii il ministri Giuli – al à dit Ciriani – pe atenzion e la prontece tal frontâ il teme”.
Secont il parê de Direzion gjenerâl archeologjiche bielis arts e paisaç, il progjet si cjate intune aree agricule cun alt risi archeologjic, siore di elements di valôr storic, paisagjistic e culturâl, metude dentri te liste dal patrimoni Unesco dal 1998. (a.d.g.) – 24.01.2025
