Dopli infortuni sul lavôr, cheste matine a Merêt di Tombe e îr di sere a Mortean. Un om al è stât socorût intes primis oris di vuê dal personâl sanitari par un incident sucedût dentri di une ativitât produtive a Merêt di Tombe. Par causis in cors di aciertament de bande des fuarcis dal ordin, al è restât ferît a un pît. La vitime dal signestri e je stade curade dal personâl di une ambulance e traspuartade cun feridis no gravis li dal ospedâl di S. Denêl.
Il secont infortuni al è sucedût îr a Mortean cuant che une persone e je stade socorude intal dopomisdì sul tart dal personâl medic infermieristic pes feridis dopo une svol di plui o mancul 3,5 metris di altece di une bale di fen. Dopo l’alarme lançât cuntune clamade al Numar unic di emergjence, sul puest a son rivâts l’ecuipaç di une ambulance di Codroip e l’elisocors. Il personâl medic infermieristic al à assistût la persone che e je stade traspuartade al ospedâl Sante Marie de Misericordie di Udin cu la ambulance in codiç zâl. (a.d.g.) – 19.09.23
