Il Nucli Ispetorât Carabinîrs dal Lavôr di Udin, cu la colaborazion dai militârs de Compagnie intai dîs passâts al à fat controi intal setôr dai esercizis publics, agriculture e edilizie che a àn cjatât inadempiments in materie di sigurece sui lûcs di lavôr tant che la mancjade redazion e inzornament dal DVR, la mancjade formazion in materie di sigurece dai lavoradôrs, la mancjance de cassele di prin socors, l’ûs di implants di videocontrol no in regule, la mancjance di manutenzion dai presidis antifûc e la presince di lavoradôrs in neri.
A son stâts controlâts cuatri esercizis publics, une aziende agricule e une aziende che e opere intal setôr agricul. A son stâts 25 i lavoradôrs individuâts e a son stadis sospindudis lis ativitâts di un cantîr edîl, doi esercizis publics e une aziende agricule par violazions gravis su la sigurece e presince di lavoradôrs “in neri”. In dut a son stadis fatis sanzions par plui di 100 mil euros. Sanzions par 29 mil euros par une aziende agricule a Tresesin par no vê butât jù il Document di valutazion dai pericui e pe presince di doi lavoradôrs in neri. E’ stade disponude la sospension de ativitât imprenditoriâl par lavôr neri e par violazions gravis su la sigurece. Sanzions par plui di 16.500 euros intun ristorant etnic a Codroip, dulà che a son stadis cjatadis violazions in materie sigurece sui lûcs di lavôr. Sanzions par plui di 16.500 euros intun bar di Reane dal Roiâl dulà che a son stadis cjatadis violazions in materie di sigurece sui lûcs di lavôr. Sanzions par plui di 24.000 euros intune sale zûcs a Maian che al so interni a son stadis cjatadis violazions in materie di inzornament dal Dvr, mancjade manutenzion dai presidis antifûc, mancjance de cassele di prin socors. Al risultave, cun di plui, instalât un implant di videocontrol cence la autorizazion. Ancjemò un ristorant etnic sanzionât a Udin par plui di 10 mil euros, dulà che a son stadis cjatadis violazions gravis in materie di sigurece sui lûcs di lavôr par no vê butât jù il document di valutazion dai pericui; disponude la sospension de ativitât imprenditoriâl par violazions gravis su la sigurece. Infin, sanzions par plui di 8 mil euros intun cantîr edîl a Martignà, dulà che a son stadis cjatadis violazions gravis in materie di sigurece sui lûcs di lavôr par no vê preparât oparis par evitâ la cjadude dal alt dai lavoradôrs e par no vê butât jù il document di valutazion dai pericui. E je stade disponude la sospension de ativitât imprenditoriâl par violazions gravis su la sigurece. (A.D.G.) – 23.02.2023
