40
Un branc di zovins îr sore sere a Pordenon al à menaçât e dât cuintri a un fantat di 20 agns, inte zone di Borgomeduna. Il fantat al à vût a ce fâ cun plui o mancul une desene di zovins che a àn cirût di rapinâlu, ma al à tignût dûr devant des menacis e par chest lu àn pacât.
Il zovin al à scugnût lâ in ospedâl, ma lis sôs cundizions no saressin griviis. Sul puest a son rivâts i agjents de Polizie di Stât. Si pense che i zovins che a àn cirût di rapinâ îr a sedin simpri chei che intai dîs passâts a vevin cirût di robâ a doi fantats tra vie Bertossi e plaçâl Caduti di Nassirya. (a.d.g.) – 24.03.2025
