“Sô gnece e sta mâl e e à bisugne di curis cjaris”. Cheste e je la frase che, par solit, i malvivents a doprin tai imbrois telefonics che intai ultins dîs a son stâts tentâts cuintri di diviers udinês, doi di chescj lâts magari cussì no a bon fin.
I residents a àn vût lis clamadis sul numar di cjase. Di chê altre bande de cuarnete la vôs di chê che e pretindeve di jessi une gnece, ricoverade in cundizions gravis in ospedâl e bisugnose di bêçs par fâ front aes curis cjaris. In doi câs, magari cussì no, i disgraciâts a àn consegnât ae femine che si è presentade dopo ae puarte, i sparagns che a tignivin in cjase e ciertis zoiis di aur.
In maniere fortunade, gracie ancje aes campagnis continuis di sensibilizazion dai citadins sui pericui leâts al ûs di telefons, smartphones, internet, fatis di agns de Polizie di Stât, la plui part des personis contatadis no je colade inte vuate e a à sierât daurman la telefonade, segnalant dopo ae Sale Operative de Cuesture il fat. Sui imbrois la Polizie e je daûr a fâ investigazions par cjatâ i responsabii. (A.D.G.) – 15.06.2023
