Anzians maltratâts, siet misuris cautelârs

I Carabinîrs dal Nucleo Antisofisticazioni e Sanità (Nas) di Udin a àn scuviert un gnûf câs di maltrataments cuintri anzians no autosuficients intune cjase di polse de ex provincie di Udin. Joibe ai 14 di Lui, i militârs, adun cui coleghis dal Nas di Trevîs e dai Comants provinciâi, a àn fat siet misuris cautelârs, decidudis dal Gip dal Tribunâl di Udin daûr domande de Procure de Republiche. Si trate di cuatri arescj domiciliârs, dôs improibizions di svicinament ae persone ofindude cun improibizion di esercitâ la profession e di une improibizion di esercitâ la profession sanitarie. La investigazion e jere stade inviade dal Nas intal 2021, dopo di cualchi segnalazion di compuartaments insolits viers dai ospits di une residence furlane par anzians no autosuficients. (A.D.G.) – 14.07.2022