Aquilee: trê dîs par celebrâ i 25 agns de Unesco

Fint ai 7 di Dicembar, Aquilee e je daûr a celebrâ i 25 agns de iscrizion inte liste dal patrimoni mondiâl de Unesco. Un ricognossiment impuartant, che al è servît al disvilup turistic de citât e al à vierzût la strade a tancj altris lûcs in regjon. Par trê dîs a son previodûts incuintris, confronts, dialics e conversazions cun istituzions, operadôrs dal setôr turistic e gjornaliscj. La scree martars di matine inte basiliche patriarcjâl, cui salûts istituzionâi. Li de aziende Ca’ Tullio si è vierzude la cunvigne, che e larà indevant joibe ai 6 e si sierarà vinars ai 7 tal Museu archeologjic, tratant i temis leâts al patrimoni Unesco, dal plan di gjestion ae ricercje, ma ancje comunicazion, acessibilitât e turisim lent. Previodût ancje un aprofondiment su la rêt dai sîts Unesco dal Friûl-Vignesie Julie e sui progjets leâts a “Go! 2025”. (A.I.) – 05.12.2023